وللوحدة عذاب يسمى الملل

الوحدة عند البعض ميزة ومتعه وراحة نفسية ولكنه داخليا عندي ليس بهذا ..

اشعر داخل نفسي بشعور يشبه الموت البطىء ، شعور قاتل يجعلني في بعض الأوقات اشعر بانى سأصبح من الاشرار قريبا جدا  .

لا اعلم ربما تكن تهيئات وهواجس لحالة اكتئاب بدرجة متأخرة ، ام هو رد فعل طبيعي لكل ما يدور حولي من انفعالات وضغوط نفسية فقط !!!

كل ما اعلمه انى وصلت لمرحلة متاخرة لا يمكننى السيطرة عليها وحدي ، وهذا ما يحزنني اكثر هذه الحقيقة العارية انى وحيدة في عالم غريب عنى لا اشعر بالانتماء اليه ولا احب ان اتعمق به ...

متى سأنتهى من هذه الحالة هل غدا ! بعد غد ! هل سيأتى اليوم حقاً وأودع فيه هذه الحالة ام سيحن لى القدر قريبا ويأخذني اليه ....ميرو أنتكة

حب القلوب ...

مازلت ابحث عن حب القلوب ولكني لا ارى امامي غير حب الأذن فقط ..

لا يملكون فى القلوب غير حب الحديث النابع من الاذن  ولا يعنون ما هو حب القلوب الذي هو هبه من الله عز وجل !!!


حب القلوب لا يستطيع اي حاجز ان يتصدى له فاهتمامه وافعاله من القلب لذا استقبالها  يصل للقلب مباشرة .


اما حب الكلام فحواجزه ضعيفه فهو يتنقل من الاذن للقلب ثم نهايته الى العقل والذي يضع رد الفعل منه بطريقة غير مباشرة .


رد الفعل حينها يكون اقسى من القلوب ...



لا تخسروا من تحبون ويتحول الشعور بينكم لشعور سمعي وليس حسي ...فالنهاية حينها قاسية ..ميرو أنتكة

إنتفاضة المهندسين

إنتفاضة المهندسين ليست إلا حقوق مشروعة نطالب بها ..... فالمهندس اليوم اصبح من اكثر المسلوبين حقهم بمصر ومستهان بكرامتهم خارج مصر ..... فكيف أصبح المهندس عاااااطل ؟؟!!!!!

نعم انه المهندس المصري مهندس بلا نقابة تعطيه كافة حقوقه المطلوبة منها بلا نقيب يهتم .......

ولكن الى متى ؟؟!! هل سيظل المهندس مسلوب حقه هكذا ؟ لا اعتقد هذا فبدءت الانتفاضة ولكنها لا تنتهي فهى مستمرة لحين تحقيق كافة حقوق المهندسين .

وسنجبر العالم أجمع لسماعنا وتحقيق مطالبنا ..
https://www.facebook.com/groups/entefadaaaaaaa/

شهيد المحلة ...ربنا يرحمك يا ابراهيم


ايه ذنبي بس يا بلادي ... ده انا رايح اغني للنادي

رايح اغني ومبسوط ... ارجع بدمي ومخبوط

سامحيني يا أمي سامحيني ... دمعتك دي والله على عيني

ماسك علمي وبنادى ... احكم يلا يا قاضي...ميرو انتكة

فوقي يا بلد فوقي


فوقي يا بلد فوقي ... ده دمي بيبكي ف عروقي

وقلبي عليكي مش عارف ... يصرخ وألا يقولك روقي

حزينة حبيبتي علي حالك ... وبسال بقول مالك

ده مصرى ده اللى خانك ... ودمه بيجري فى عروقك !!

دي بلد الأمن والأمان ... دى ماتت والا بعها وخان !!

اللي ما فكر لحظة يصونك ... حبيبتي محسودة من يومك ... ميرو انتكة

لملمت دموعي .... فتوكلت



لملمت دموعي داخل احقاب نفسي ورحلت

بلا عنوان يُرجِعَني ويرشدني وعزمت


لا قلب ولا عمر قد رأيت

خوف بلا رجعة قد اَمرت


أيا مَعشَر الرجال قد خالفت

ثقة بلا ثقة فتوخيت



أخذ بلا معطى قد وجدت

حب بلا حب فقد تخيلت


ابعدوا عني فبالله انا توسلت

بلى فان معى ربي .... عليه انا توكلت ...ميرو انتكة

عجباً لدوامة القدر



تمر بنا الايام دون النظر لنهايتها ولكن المكتوب سنجده اينما كنا



بعد مرور ايام من الخطوبة ...



قالت له : استحبني مهما بلغ بي العمر



قال لها : انتِ محبوبتي وصغيرتي لآخر العمر



قالت له :سأبقى معك وبجوارك دون النظر لجمالك



قال لها : سأظل احبك مهما طال عمرك دائما بجوارك






وبعد مرور 5اعواام من الزواج ...



قالت له : امازلت تحبني رغم التعود على رؤياي ؟



قال لها : اجل يا صغيرتي وسأظل اشتاق الى رؤياك ...






بعد مرور 15عام من الزواج ...



قالت له : هل ساعدتني فى حمل هذه الاشياء وتصليح هذا الجهاز



قال لها :الستِ انتِ من وعدتني بخدمتي طيلة العمر ...هل طال بكِ العمر ؟!



قالت له : لا ... ساظل معك وبخدمتك لآخر العمر






بعد مرور 20عام من الزواج ...



قالت له : هل من الممكن يا حبيبي تعطيني مبلغ من المال



قال لها : لماذا ؟ أتريدين شيئاً زائد عن حاجتك ؟ هل طال بكِ العمر ولا تستطيعين تدبير امورنا



قالت له: آسفة يا عِشرة العمر... سأصرف نفسي ولا تغضب نفسك بسببي.. معك الله يا حبيبي






بعد مرور 25عام من الزواج ...



قال لها : جرس الباب يضرب افقدتي حاسة من حواسك ...أطال بكِ العمر !



قالت له : آسفة يا حبيبي على التأخير سأجيبه سريعاً ولا تغضب



قال لها : ماذا حل بكِ الن تتذوقي الطعام من قبل ..انه لسىء ..أطال بكِ العمر!



قالت له: آسفة سأظل اخدمك لآخر نفس بي وسأتذوقه بقلبي






بعد مرور 30عام على الزواج ...



قال لها : لقد مللت منكِ وطال بنا العمر سوياً



قالت له : لماذا يا عِشرة العمر لقد خدمتك برموشي وبقلبي طيلة العمر



قال لها : ولكن ظهر عليكِ العمر حقاً ولستِ محبوبتي التي عشقت جمالها ونشاطها



قالت له : ولكنك مازلت حبيب العمر مازلت تملىء قلبي الصغير ولن تتغير مع العمر



قال لها : ولكني سأبحث عن شريكة جديدة تُكمل معي الباقي لى من العمر



قالت له : افعل ما تريد ولكنِ سأظل احبك ولن يذهب قلبي لغيرك لآخر العمر






وبعد مرور عام من زواجه ...



اذ جمعهم القدر فى احدي الطرقات



قال لها : الازلتِ تحبينني يا صغيرتي ؟



قالت له : ومن يستطيع نسيان عِشرة العمر



قال لها : لقد ملت مني زوجتي الجديدة ولن تستطيع تحملى



قالت له : صبراً يا شريك العمر ...باقي لك 30عام تحملها كما تحملتك انا من قبلها






عجباً لدوامة القدر ... يفتح لنا ابواب السعادة والامل فى بدايته ويعوض ما أخذه بقسوة نهاية العمر ...ربي احرمني من قسوة النهاية وتوفني بكامل صحتي يا ارحم الرحمين ...ميرو انتكة

ف الطريق




ف الطريق وشوش تعبانة من الهم والجوع القلوب مليانة ... بيدعوا ربهم من الهم يفكهم وع الطريق الصح يدلهم بأمانة.

ف الطريق قابلني طفل حزين .. سألته ليه انت حزين؟ قالي نفسي الشيبسي العائلي يبقى بخمسين .. قلتله إصبر مصر بعد 25أحسن من قبل 25 .

قابلت معاه شاب مريض وهزيل .. سألته من إيه انت حزين ؟قالي ومنين اتجوز وف جيبي ولا مليم .. قلتله تفائل الدنيا بعد 25غير قبل 25.

تعب قلبي وع البيت هديت ..قدام المرايا لقيت ..وش حزين ..سالته وليه انت حزين ؟..قالي مصر ما اتغيرتش بعد 25ولا قبل 25..تكاتك ع الطريق كتير عاكسيين ..سكت قلبي ع الكلام ساعتين .

ومن بعيد لقيت شباب واقفيين ..ينظفوا بلدهم وع بكرة ناويين مع المرور سانديين ॥سألتهم انتم ليه متفائليين ؟..قالوا لى بكرة لينا وبإيدينا للجهاد بادئيين ..قلتلهم يحفظكم لبلدي رب العالميين ميرو انتكة

بإيدك يا ولدي


بإيدك يا ولدي قررت نهايتي

بطمعك وجشعك دبحت كرامتي.


وبإيدك يا شعبي خلعت رئاستي
ده مش بسببي بسببك يا ولدي.


نهايتي يا بلدي بداية كرامتك

نهاية حكايتي بداية عظمتك .

بحبك يا بلدي




بحبك يا بلدي رغم المحن ...
رغم النميمة ورغم الفتن.



بحبك يا بلدي رغم الي فيكي ...
رغم الهوان والظلم عليكي .



بيقولوا حبايب ويقولوا شقايق ...
ورغم الجزيرة ربي حاميكي.



بحبك يا بلدي ورغم الي فيكي ...
بحبك يا بلدي وقلبي عليكي.... ميرو انتكة

يا حكومتنا


يا حكومتنا يا محيرانا ....

بيكي نحيا والبوليس ورانا



حكومة نضيفة بريئة ...

دبحت حتى الحقيقة



مستقبلنا يا مستقبلنا ....

بيكي قتلتي معاكي أحلامنا



ولو جينا يوم وإتكلمنا ...

يخرس فيكي حتى لسانا ...ميرو انتكة

القلم السحري


في الفترة الاخيرة بنسمع اسم الصين اكتر ما بنسمع صباح الخير



انزل اشتري لاب يتقال لى خلاص بقى كله دلوقتى صيني

اقول اغير الموبيل الاقي الى فى السوق بقى كله صيني

حتى اللب بقى صيني والله انا خايفة اطلع ف الاخر اصلى كان صيني



واخر مجاييب الصين لمصر القلم السحرى...


قلم النصب العالمي وصل مصر بكل بساطة هو قلم جاف عادي خاااالص بس فيه سر صغير تقدر تمسح الكلام كله بكل سهولة بولاعة او ببيختفي لوحده بعد مده معينة تقريبا ساعة...ده غير طبعا القلم الصيني الى فيه ميمورى يقدر يخزن اى إمضة بكل سهولة .



يا عينى عليكي يابلدي الاحتلال بيجيلك من كل ناحية واحنا بكل استسلام واشراق بنستقبل ده...



بحبك يا بلدي رغم الي فيكي... رغم الهوان والظلم عليكي


بحبك لو قالوا لى كل الى ماليكي ... بقى كله كله بقى كله صيني...

مجروح


مجروح حبيبي وحيد ....


محتاج حبيبي دواه


ومنين يا اهل الهوا ...


أجيب لحبيبي الدوا


من قلب لسه فقير ...


ما عداش طريقه بميل


غالي الدوا غالي ...


غالى يا أهل الهوا


ومين يصلح حالي ...


ويجيب لحبيبي الدوا

اوعدني


إوعدني هتسيبني تبعد وتنساني ...


وقبل ما أقولها هتقولها علشاني .



صدقني حبيتك وبقيت حبيب عمرى ...

ولا عمري من بعدك هشوف حبيب تانى .



من بعدك قلبي حزين مكسور ووحدانى ...

بس ضميرى سعيد لحياتك انساني .



اوعدني اشوفك سعيد وكل يوم ليك يوم عيد ...

بس حبيبي عشاني وحياتك انساني..... ميرو انتكة

لعبة الحياة



إذا أتى لك الحب يوما من الشباك حاملاً معه الحيرة والقلق تأكد من خروجه يوماً من الباب تاركاً لك رواسبها .


الحب كالقطار ننتظره كثيرا لكي يأتي ولكنه يأتي قبله الكثير من القطارات التي يمكن أن تقف لنا ومنا من لا يستطيع أن ينتظر قطاره و يلحق بها وأيضا منها القطار السريع الذي يأتي ويذهب سريعا ولكننا نحس بوجوده .ونستمر ف انتظار قطارنا الذي يقف لنا ونستمر معه ألا وهو قدرنا
.


الحب أيضا كالحكم ف المباراة مع بداية المباراة يجرى وراء هدفه ويرصد حركاته وإذا أخطأ له فرصة الإنذار وإذا كرر الخطأ فيطرد من المباراة .من يحترمه ويحترم قواعده يستمر ومن لا يلتزم يطرد من المباراة .


تغير الحب كثيرا ما بين زمن الحب الجميل زمن أم كلثوم وعبد الحليم وزمن ....

الحب الآن ما هو إلا نظام اجتماعي يكمل بين عائلتين لكي تستمر الحياة وتستمر البشرية ليس إلا ، إنما الحب في الزمن الجميل فهو كان ترابط حسي وروحي بين شخصيين فقط يربط بينهم شعور جميل فيكملوه بالزواج وليس بالعكس كما يحدث في زماننا هذا .

فلابد أن لا نندم عندما نحب حتى إذا ترك هذا الحب وراءه ذكرى تؤلمك ....بالفعل ليست المأساة رحيل من نحبه ولكن المأساة الحقيقة هي رحيل قلبنا معه....فهو الشيء الوحيد الذي لا يمكننا إرجاعه.


ولكن ستستمر الحياة باستمراره أو فقدانه لأنها هي لعبه الحياة التي لا تنتهي إلا مع خروج آخر نفس منك .....ميرو انتكة

take it or leave it


وحشتووونى جداا بجد ووحشتنى المدونة قوى والكتابة ....بس الحمد لله بعد كل الفترة دى اتأكدت ان الى فاضل لاى حد هى الذكرى الحلوة واعتقد ان المدونة هى احسن ذكرى لاى انسان .


يا ترى الذكريات لينا بتمثل حاجة كبيرة قوى والا ماضى وبيتقفل ؟؟؟



فيه ناس الذكريات بالنسبه لهم مكتبه مليانة كتب كل كتاب منها جواه ذكرى وحكاية مع حد ومع نهاية اخر سطر ف الكتاب بتبقى نهاية الذكرى .


وبتترتب الكتب دى بطريقة معينه ، فيه منها الى بيتركن ويتنسى وفيه منها الى بنحب كل مده نقرأه .



هى دى حياة الانسان شريط ذكريات فيه منها الى بنحاول ننساها ومش قادريين ومنها الى بنحاول نفتكرها علشان نقدر نكمل .


بالظبط زى محطة القطر ناس بتودع ناس وف نفس اللحظة ناس بتستقبل ناس .


هى دى الدنيا شريييييط قطر ناس بتعدى عليه وتسيب لنا ذكرى كويسة وغيرهم يعدوا عليه وممكن يجرحوه ويسيبوا ذكرى وحشة.


المهم كل مده نسأل نفسنا يا ترى احنا بالنسبة لغيرنا مجرد ذكرى وحتى لو مجرد ذكرى يا ترى ذكرى منسية ف مكتبة مهجورة والا ذكرى كويسة تتنسب لنا ....ميرو انتكة





يا حبيبتى يا مصر..يا مصر

من مدة اتكلمت عن الحلم القاتل بس كان حلم انما دلوقتى بقى حقيقة .......

الرياضة مش مكسب وخسارة لالا الرياضة قبل كل ده اخلاق .






بمتابعتى لاستاذ ابراهيم حجازى من بداية الماتش لغاية دلوقتى ، انسان بيحب مصر قوى وبيخاف على كل روح مصرية موجودة فى السودان وعلى كل حقوقنا وبيخاف على اسم مصر وكرامتها .




بس فى رأيكم كده ايه الى وصلنا لكل ده يا ترى ؟؟؟
------علشان اختيارنا للسودان كان على أساس غلط !!
------- علشان طيبتنا او بالاصح سذاجتنا !!!
------- والا الموضوع سياسى على كبير قوى ومترتب ومنظم .......!!
--------والا الاعلام السبب بداية من الاعلام الجزائرى ........!
--------والا لاختيارنا الخاطىء لسفراء بلادنا فى الخارج ......!


اتعلموا منهم .....


والغريب فى الموضوع صمت حكومة الجزائر لكل الى حصل لا ومش كده وبس ده غير الى حصل للمصريين فى الجزائر .


مش عارفه ليه الغل ده كله يطلع كل مرة ،ما لوعلى الكورة عرفنا مين ابطال القارة

بتعاملنى فجأة كأنى عدوك الصهيونى تحرق علمي تشتم امي ولونك هو لونى................






فجاة نسيوا جميلة بو حريد وازاى مصر ساعدتهم ايام الثورة !!!



فى الاخر اكيد الى حصل ده لازم له واقفه كبيرة قوى مش للشعب الجزائرى وبس لا ولسفير الجزائر فى مصر اكيد وكمان سفير مصر فى الجزائر .....يا رب احمي مصر من كل الحاقديين .


مبروك عليكى يا مصر بجد كسبتى احترام وفخر الجميع .......ميرو انتكة






اول تاج استلمه من الجميلة مروة صاحبة مدونة احلى ملاك




اولا وحشتونى قوى

ثانيا:- باركوا لى الاول كده
كتبت فى مجلة جميلة قوى وفعلا حبتها من اول ما دخلت فيها وقرأت مواضيعها الجميلة مجلة رؤية مصرية
http://www.roaua.com/article.php?id=555

كتبت سلسلة حلقات باسم هناء وشيرين شوفوها ويارب تعجبكم .
ــــــــــــــــــــــــ
ثالثا بقى نيجى لاول تاج استلمه ويارب اقدر عليه واجاوبه تمام

بسم الله نبدء
ــــــــــــــــــــــ


1

-------

من انت ؟؟؟


اكيد سؤال صعب قوى بس هاحاول اجاوب عليه
انا مروة ، 21 سنة ، كلية الهندسة ، جامعة المنصورة ، 3 عمارة
بحب الناس قوى مع انى بحب اكون لوحدى طول الوقت
ــــــــــــــــــــــــــــــــــــــــــــــــــــــــــــــــــــــــــــــــــــــــــ

2

---------

ماذا تفعل هنا ؟؟

انا بحب الكتابة جدا من صغرى ، بحب اقول رايى من غير اى خوف ولا ضغط

حاولت كده فى الطبيعه بالتعامل مع الناس لقيتها صعبه جدا ، لقيت الفرصة دى بس على المدونة وفعلا لقيت نفسى الى كانت تايهة عنى هنا فى المدونة .


ـــــــــــــــــــــــــــــــــــــــــــــــــــــــــــــــــ


3

---------

إسرائيل تقصف كل جنوبٍ ممكن بحثاً عنك ، أي شمالٍ تقصد ؟؟


لا حول ولا قوة الا بالله انا ده انا غلباااااااااااااااااااااااانة وماليش فى الجو ده


بس عموما لو اقدر اضحى بنفسى علشان اى حد اكيد مش هتاخر .


ــــــــــــــــــــــــــــــــــــــــــــــــــــــــــــــــــــ


4

---------

أنت مكلف بحذف حرفٍ من حروف العربية ، أي حرفٍ تحذف ولماذا ؟؟؟


ههههههههه انا لو عليه يبقى حرف الراء

لانه كان عامل لى مشكلة جامده فى صغرى بس حاليا الحمد لله بقى تمام

بس يمكن تقول عقدة بقى .....


ـــــــــــــــــــــــــــــــــــــــــــــــــــــــــــــــ


5

---------

لو قدر لك أن تدخل السجن ، فما القضية التي تود أن تدخل بها إليه ؟؟


يعنى ممكن سياسة او حد اذى حد عزيز عليه .....لا قدر الله فى الاتنين طبعا


ـــــــــــــــــــــــــــــــــــــــــــــــــــــــــــــــــــ


6

---------

متى اكتشفت نفسك ؟؟


اكتشفت نفسى من سنة ونص تقريبا او بالاصح من بداية التدوين فعلا لقيت نفسى الى كنت بدور عليها طول العمر كله


ــــــــــــــــــــــــــــــــــــــــــــــــــــــــــــــــ


7

---------

على مفترق الطريق لافتتان ، إحداهما تشير" إلى حلمك " والأخرى " إلى ما يحلم به الآخرون " إلى أي واحدة تتجه ؟؟


لا الصراحة انا كنت زمان على طوول بمشى فى طريق مايحلم به الاخرون بس كنت على طول بخسر وبتعب ولما غيرت اتجاهى لطريق الى حلمك لقيته اريح واحسن لانك استحالة تقدر ترضى كل الى حواليك

فانا هختار " الى حلمى "


ـــــــــــــــــــــــــــــــــــــــــــــــــــــــــــــــــــ


8

----------


نحن لا نعيش حياتنا بل نتعلم فيها كيف نعيش ، ما تعليقك ؟؟


اكيد طبعا موافقه عليها جدا

كل يوم واحنا عايشين بنتعلم حاجة جديدة بنغلط ونتعلم الصح بنقع وبنتعلم ازاى نقف لوحدنا وكده الحياة كلها تجارب والذكى الى يتعلم منها وما يقعش بسببها مرتيين


ــــــــــــــــــــــــــــــــــــــــــــــــــــــــــــــــــــــ


9

----------


بجملةٍ واحدة ، اكتب تعريفاً لكل كلمةٍ من الكلمات الآتية (الوطن-الأم-الليل-الحب-أمريكا-المرأة-الصمت-الإنترنت) ؟


الوطن :- امى فعلا، برغم كل الى بنشوفه منها بس لازم نرجع لها ونترمى فى حضنها .


الام :- الحنان والعطاء هى الى تقدر تعلمك ازاى تحب او ازاى تكره.


الليل :- الهدوء والرومانسية وبداية يومى .


الحب :- الحياة والروح الى من غيرها البنى ادم ميت .


امريكا :- تطور وتكنولوجيا بس فى الاخر غضب ربنا اقوى من كل ده .


المرأة :- كائن ضعيف ورقيق امنية حياته يحس بالامان والحب .


الصمت :- الصمت ملاذى فعلا ، الهدوء والخيال .


الانترنت :- حياتى ، مستقبلى ، ادمان


ــــــــــــــــــــــــــــــــــــــــــــــــــــــــــــــــــــــــــــ


10

----------


قيس وعنترة وجميل هم الذين يقولون شعرا ، وليلى وعبلة وعزة صموت ، لم هذا التغيب للمرأة ؟؟


المرأة كائن خجول بطبعه وطبيعى انها بتحب تسمع وقليل انها تتكلم بالعكس الصمت ده دليل على الحب اكتر برايى لانه بيبقى بالنسبة لها اكتر من كلام يتقال .


ــــــــــــــــــــــــــــــــــــــــــــــــــــــــــــــــــ


11

---------

إلى أين تمضي كلمات الحب بعد أن تقولها ؟؟


الحقيقة لسه ما قلتهاش لحد ، بس الاهم الفعل، بس اكيد مع شوية كلام بس يبقى ليه مش منى ههههههه انانية شوية معلش.


ـــــــــــــــــــــــــــــــــــــــــــــــــــــــــــ


12

---------

هل تجد علاقةً بين المرأة وقطاع الطرق ؟؟


الكائن الرقيق ده صعب تلاقى تشابه بينه وبين قطاع الطرق زى بالظبط فيه تشابه بين الضباع والفراشات


بس يمكن فيه شعور واحد يمكن بيجمع بينهم الاتنين على طول فى خوف ومش حاسيين بالامان بفرق الاسباب طبعا .


ــــــــــــــــــــــــــــــــــــــــــــــــــــــــــــ


13

----------

هذا فراق بيني وبينك ، لمن ومتى تقولها ؟؟


لا يمكن الجملة دى بحسها تتقال للاولاد اكتر يعنى اكيد فيه فروق كتير فى رد الفعل بين الولد والبنت ، تعامل الناس مع الاتنين والتفرقة الى بتحصل ونظرة الناس بين عيب وحرام للولد والبنت ........


ـــــــــــــــــــــــــــــــــــــــــــــــــــــــــــ


14

---------

كيف هو غدا؟؟


اكيد نفسى بكرة يكون احسن واحسن ونظرة المجتمع للبنت تختلف


ــــــــــــــــــــــــــــــــــــــــــــــــــــــــــــ


15

----------

لمن تمرر التاج؟؟؟


والله لو عليه للكل اى حد يتفضل ياخده طبعا ......متبرعه بيه ليكم كلكم


ــــــــــــــــــــــــــــــــــــــــــــــــــــــــــــــــــ


الحمد لله انتهت العملية ويارب اكون قدرت اجاوب وابين شخصيتى فى التاج ده وكل سنة وانتم طيبين ..............ميرو انتكة

احنا فى رمضان


ازيكم يا جماعه والله فعلا المدونة وحشتنى قوى الفترة الكبيرة دى بس ادينى رجعت تانى انا ماليش غيرها هروح فين يعنى انا نجحت الحمد لله وكمان كملت ال21 سنة عقبالكم ياارب .



نزلت فى رمضان الشارع قلت اشووف رمضان ازاى السنة دى مع الناس المهم لقيت العجايب .



  • قلت اروح اشترى حاجة لقيت البياعين بيزودوا فى حقها اسعار سياحيه.. ..يا جماعه عيب احنا فى رمضااان.

  • اشتريت عرض من الى بيجى فى التليفزيون زودوا عليه تقريبا تمنه ........يا جماعه عيب احنا فى رمضاان.

  • الناس ماشيه تعاكس فى الشارع بطريقة مستفزة وحريقة فى السجاير الانتقام فعلا ....يا جماعه عيب احنا فى رمضان.

  • وااااه على المسلسلات ما شاء الله الاعلام الجميل بتاعنا مش مدينا فرصه نتنفس او نحس بجمال رمضان كمية مسلسلات رهيبة بجد قبل وبعد الفطار .....يا جماعه عيب احنا فى رمضاان.


هو رمضان قبل المغرب وبس ؟؟ يعنى صوم وخلاص والا ايه بالظبط؟؟؟؟



فعلا الناس بعد الفطار بترجع لطبيعتها او اكتر كمان مسلسلات وسجائر ونصب فى الاسعار وحاجات كتير قوى يعنى كل الى بنحاول نعمله ونزود بيه الحسنات قبل الفطار على طوووووول بعد الفطار بيروح ما شاء الله طبعا .



يا جماعه عيب بجد احنا فى رمضان يعنى كل واحد لازم يقرر رمضان السنة دى هتعلم ايه جديد؟ هاغير من نفسى ايه فى رمضان السنة دى؟ كده هو ده رمضاان .



انا السنة الى فاتت كنت كاتبه الى ناوية اعمله فى رمضاان وفعلا نفذت تقريبا الى قلته .



رمضان بقى السنة دى قررت اعمل حاجة جديدة شوية بمعنى انى حسيت ان صلاتى فى البيت افضل وكمان قررت انى ما افتحش نت كتير فى رمضان يعنى تغيير شوية لان فعلا النت ده زى السجائر ادمان .......هو ده رمضان اننا نفكر فى حاجة جديدة نتغير للاحسن خطوة مش نرجع خطوتيين.



انا من الى شوفته بجد قلت لازم اتكلم ..........يا جماعه عيب احنا فى رمضااان .



رمضاان كريم على الامة الاسلامية كلها وياا رب نطلع خطوة مش ننزل خطوتيين .




ميرو انتكة......

يا خارجية فينك فينك...دم مروة بيننا وبينك



الجملة دى كانوا بيرددوها الناس فى جنازة شهيدة الحجاب مروة الشربينى



حسبنا الله ونعم الوكيل


شابه مصرية كل الى اجرمت فيه انها مسلمة وانها ملتزمة بحجابها


للاسف دى لا اول جريمة تعصب ضد الاسلام ولا الاخيره


ده اكبر دليل ان الارهاب مالوش دين والتعصب موجود للاسف فى كل الاديان


انا بجد لما سمعت الخبر ده استغربت لحال المسلمين وبالاخص المصريين والاضطهاد الى بيحصل لهم بره مصر فى الدول العربية زى الى حصل للدكتور الى اتجلد فى السعودية والمهاذل فى المرتبات الى بيعملوها السعوديين للمصريين لا وكمان فى الدول الاوربية


سمعت كمان خبر عن امام عربى اتقتل وولعوا فى بيته تقريبا فى ولاية كاليفورنيا كل ده ليه ...علشان مسلم يا ترى ده بقى دلوقتى سبب لكل الجرايم دى .....حسبنا الله ونعم الوكيل

ومازال الهجوم ضد الحجاب مستمر وضد الاسلام والعرب

والله زماااان يا مصر

بالصدفة وانا باقلب فى الصور الى على جهازى لقيت الصور دى من جرائد زمان الجميلة والى بتفكرنا بصحافة زمان الله يا مصر ....اسيبكم مع الصور ونتقابل بعدها......


















































































بعد ما شفتم الصور اكييييد كلكم جواكم كلام كتير وانا كمان اول ما شوفتها قلت وحسيت بحاجات جميلة اكيد كلنا او اغلبنا ما عاصرش الايام دى يعنى يادوب نسمع عنها حكاوى وخلاص ......ميرو انتكة

































اخبار..اهرام ..جمهورية


بسم الله


اول خبر عندى

طبعا كلنا سمعنا عن الرئيس اوباما وزيارته لمصر وطبعا الشعب المصرى كله فرحان ومتفاؤل .......انا بقى لا.


اولا عندى احساس ان اوباما ده اما زكى جدا وعرف ازاى يكسب العرب ودخل لهم من ناحية الدين ولانه عارف ان العرب كلهم بيصدقوا بسرعه او عايزين يصدقوا ويبقى كده قدر يكسب حاجات كتير بكل بساطة وفتح لنفسه كتير قوى من غير اى تعب.


او يمكن يكون كلامه ده مظبوط ونفسه يغير البلد دى بس فى الحالة دى ما اعتقدش انه هيكمل اما هيتقتل وطبعا اعداءه فى الحالة دى كتير او مش هيطول فى الرئاسة........


ده رايى انا اكيد فيه كتير قوى مختلفيين معايا فى رايى بس فى الاخر اكيد الله اعلم وبلاش تشاؤم طبعا .



ثانى خبر بقى عندى اختبارات الغباء:-


طبعا كلنا بنشوف ونتابع اختبارات الغباء الى بتكتر ما شاء الله كل يوم المفتش كرومبو وسرحان ونفيسة وكتير قوى كلها بجد بتزود الغباء للاسف مش زكاء ابدا كفاية انها بتخدع كتير قوى وبتححسهم انهم لما يجاوبوا صح يبقى كده ازكيه طبعا بلاشك ..................بجد اساله ساذجة لدرجة ان اى طفل ممكن يسخر منها اومال احنا بقى ..............


دول حاجتين كانوا جوايا وحبيت اقولهم يمكن نرجع نفكر تانى وماناخدش الامور بسلبية .


ربنا يوفقنا كلنا فى الامتحانات ياااااااااارب ......ميرو انتكة.

جاهز للمقابلة؟؟؟


انا كنت ناوية اقف عن التدويين فى فترة الامتحانات بس حقيقى ما قدرتش لان المدونة دى حياتى بعيدا عن جو الدراسة والحياة بس هى اهم حاجة عندى بجد.


احداث كتير حصلت وكان لازم اقول رايى فيها زى وفاة محمد علاء الله يرحمه ويصبر امه يارب.


فكرت كتير قوى وسالت نفسى كذا سؤال ...


انا لا قدر الله لو اتحطيت فى موقف زى ده هاتاثر ازاى؟ ورد فعلى هيبقى ازاى ؟ اكيد خفت فى الاول بس فكرت وقلت ليه ازعل اكيد ربنا لما بياخد شخص يعنى بيحبه وهو دلوقتى مع ربنا فى حياه جميلة اكيد اجمل بكتير قوى من الدنيا دى.


بس فى الاول لازم نكون مستعديين للحظة دى لحظة الموت....يا ترى انت او انتى مستعدة للحظة دى



اكيد سؤال صعب ممكن نكون كلنا مش عارفيين اجابته واننا فعلا مستعديين للمقابلة دى والا لا....لو عندنا مقابلة فى مادة ما مثلا فى الكلية اكيد بنكون مستعديين ومحضريين كل الى مطلوب مننا فيها ...اومال ده بقى ربنا مش دكتور مخلوق زيه زيك.....مش هتكون جاهز للقاء الجميل ده .



اكيد كلنا بنحاول بس بنسى بسرعه عادى دى غريزة فى الانسان بس بنرجع نفتكر لو حصلت حاجة جديدة بتفكرنا وبرده بنرجع ننسى تانى



انا شخصيا ولغاية دلوقتى مش باحاول افكر كتير فى الموت يعنى لو ليه نصيب هاموت دلوقتى وانا باكتب هاموت بس الاهم من كده انى اكون مستعده للمقابلة دى صح ومحضرة كل اعمالى طول العمر ........ربنا يهدينا كلنا للطريق الصح ..................


اللهم اني اسالك رحمة من عندك تهدي بها قلبي وتجمع بها شملي وترد بها الفتن عني وتصلح بها ديني وتحفظ بها غائبي وترفع بها شاهدي وتزكي بها عملي وتبيض بها وجهي وتلهمني بها رشدي وتعصمني بها من كل سوء.........................ميرو انتكة

اجمل احساس حسيته من الكلية دى


انا فرحانة قوى بجد اول مرة اتكرم فى الكلية دى ....بجد نظرتى اتغيرت قوى للكلية انها لتعليم الهندسة وبس لا وكمان بتنمى النشاط وبتحببك فى موهبتك ...اكيد ده عمره ما كان رايى فى الكلية بس فعلا اتغير قوى لما اشتركت فى المعرض الادبى فى الكلية واتكرمت واخدت شهادة تقدير لا وكمان خمسين جنية هههههههههههههه بجد احساس حلو قوى مش علشان الخمسين جنية اوعوا تفهمونى صح لا بس فعلا حسيت انى ليه مكانه فى الكلية دى .....عقبالكم كلكم لما تتكرموا يا رب

عيب والا حرام ................


يا ترى كل عيب حرام ...وكل حرام عيب ..؟


ايه الفرق بين العيب والحرام ؟


انا فى رايى ان العيب هو اى فعل بيزعل الناس ........, والحرام هو الى بيزعل ربنا .


للاسف احنا دلوقتى بنخلط جامد بين العيب والحرام .


بمعنى ان بسبب عادات وتقاليد متخلفة بقينا بنخلط العيب بالحرام ...ده بسبب ايه ؟...الخوف من المجتمع مثلا والا قله معرفة......


ابسط مثال ان مش كل عيب حرام .....فى الايتيكيت مثلا ومعاملة الغير كتير ممكن تبقى عيب بس اكيد ربنا مش حرمها


دلوقتى للاسف اى فعل بيصدر من البنت ولو بسيط لازم يتقالها ده عيب وده حرام ...استحالة نقدر نرضى الناس كلها ، ولو حاولنا هنتعب قوى وللاسف من غير فايدة


الى بيعامل بيعامل ربنا اولا مش الناس يعنى اكيد كل حرام عيب بس مش كل عيب عند ربنا حرام


لو البنت طالبت بحقها دلوقتى فى وسط اسرتها على الاقل بيتقالها ده عيب مع ان اخوها مثلا واخد حقوق كتير قوى وهى عند ربنا حرام فعلا بس للاسف مش بيقولوا له ده عيب


بمعنى ان الولد ممكن يعمل حاجات كتير قوى حرام عند ربنا ومش عيب عند الناس...بعكس البنت مثلا ابسط حقوقها انها تقول رايها ممكن يكون عيب عند الناس بس عند ربنا اكيد مش حرام


يعنى انا دلوقتى لما اكتب مواضييع بحس بيها فى المدونة وباقول رايى بجزء من الحرية عند ناس معينة ان ده عيب ...بس اكيد وده المهم انه عند ربنا مش حرام


الخلط بين العيب والحرام بقى طبيعى قوى فى مفاهييم كتير مننا ودى مشكلة كبيرة قوى ولازم نشوف لها حل ............ميرو انتكة

كيف تواجه مشاكلك مع الاخرين؟


يا ترى مواجهة المشاكل مع الاخرين شىء صعب ؟


فيه انواع كتير للمشاكل منها مثلا مشكلات الحياة & مشاكل العمل & المشاكل العائلية


لماذا تحدث المشاكل ؟
اكيد فيه دوافع كتير منها على سيبل المثال الغيرة او التنافس
وهناك ايضا مشاكل بسبب الخلافات الفكرية بين الاشخاص المختلفين فى البيئة والسلوكيات او اختلاف الاجيال
وهناك مشاكل تحدث بدون سبب معين وبدون داع
كيف نتحكم فى انفعالاتنا ؟
هل انفعالتنا من النوع الطبيعى ام انفعالات شديدة ؟ ...
يرى بعض علماء النفس ان الانفعال ما هو الا نماذج انعكاسية معينة للاستجابة ، ويرى البعض ان الانفعال ما هو الا اضطراب ناشىء عن موقف سيكلوجى، ويظهر فى السلوك ومن خلال التغيرات الفسيولوجية الداخلية .
ويرى علماء الاجتماع ان الانفعال هو اضطراب حاد يشمل الفرد كله ، ويؤثر فى سلوكه


الاخطر فعلا ان االانفعالات تنشا عنها امراض جسمانية نفسية ، مثل امراض الشريان التاجى والذبحة الصدرية والجلطة ....
لذلك لابد ان نتحكم فى انفعالاتنا لكى تزيد قدرتنا على حل مشاكلنا بافضل طريقة .
بالتسامح ايضا نستطيع ان نحل معظم مشكلاتنا دون عناء .


يعتقد علماء الاجتماع ان عدم التسامح تجاه انفسنا وتجاه الاخرين يزيد الامور تعقيدا .


تختلف نوعية المشاكل فى العمل عن تلك المشاكل التى تحدث بين الاصدقاء والمعارف.. وتكاد تنحصر فى التنافس على المنصب او مشاكل مع اصحاب العمل ...
افضل طريقه لحل هذه المشاكل هى اللجوء الى التفاوض والبعد عن التصادم والتشدداو استخدام القوة.

فى رايى الشخصى اهمهم تاثرا هى المشاكل العائلية فهى من اكثر المشاكل تاثرا على الحالة النفسية
لا يخلوا بالتاكيد اى منزل للاسف عن هذه المشاكل .
ينصح علماء الاجتماع كل فرد من افراد الاسرة البعد عن المشاكل العائلية ونتمتع بالصبر .
كيف نواجه هذه المشاكل ؟
بالديموقراطية ..... نعم الديموقراطية هى الحل ، فهى الاسلوب الامثل لمواجهة المشاكل العائلية .


من هنا راينا الكثير من المشاكل وكيفية مواجهتها بالطرق الامثل
... ميرو انتكة

تاه معنى الرجولة


الكلمة دى كبيرة قوى بس للاسف بنسمعها كتير بس مش بنشوفها غير نادر جدا


يا ترى ليه؟ ظروف الحياة السبب يمكن ......التربية الغلط يجوز ....

امتى نقول على شخص انه راجل بجد ؟ اكيد فيه صفات كتير للشخص ده مثل ( تحمل المسؤلية والمروءةوالشهامة وحسن الخلق &التضحية)

على فكرة مصطلح الرجولة للبشر ككل للرجال والنساء فهى صفة يحبهاالله ورسوله
بس للاسف معنى الرجولة تااااه فى زمننا

دلوقتى الراجل يعنى حب للسيطرة والتحكم والزعامة وفرض الراى و(الصوت العالى) ده اساسى طبعا

الرجال قوامون على النساء ...قوامون على مصالح الاسرة والانفاق والرعاية والتحمل والثبات

وصف الحق تبارك و تعالى عمار بيوت الله بأنهم رجال فِي بُيُوتٍ أَذِنَ اللَّهُ أَن تُرْفَعَ وَيُذْكَرَ فِيهَا اسْمُهُ يُسَبِّحُ لَهُ فِيهَا بِالْغُدُوِّ وَالآصَالِ رِجَالٌ لا تُلْهِيهِمْ تِجَارَةٌ وَلا بَيْعٌ عَن ذِكْرِ اللَّهِ وَإِقَامِ الصَّلاةِ وَإِيتَاء الزَّكَاةِ يَخَافُونَ يَوْمًا تَتَقَلَّبُ فِيهِ الْقُلُوبُ وَالأَبْصَارُ


**الرجولة هى ان تذكر الله دائما فى اعمالك 0
**الرجولة هى العطاء والتضحية0
**الرجولة ان تحترم من حولك وتحترم وجهة نظرهم0
**الرجولة هى ان تسمح بيدك دمعة الم على وجه بائس0

اين امثالهم الان ؟؟؟؟؟

اكيد فيه بس للاسف اعدادهم بتقل يوم بعد يوم للاسف ...........ميرو انتكة

انتهاء مرحلة الصمت

انا تعبت من الكلام بصراحة بس الحمد لله فيه افكار جميلة بدءت تتنفذ وجميل اننا نفكر

فيه افكار كويسة قوى ممكن نساعد بيها اخواننا فى فلسطين منها مثلا:

**فكرة اننا نتصل باهل غزة ونصبرهم ونحسسهم اننا جانبهم وحاسين بيهم هى فكرة جميلة بس تنفيذها مش سهل بس مش مستحيل ممكن نصبرهم برسايل حتى اى حاجة بسيطة اكيد هتفرق معاهم

**فيه فكرة كمان زى التبرعات اما باالمال او التبرع بالدم , الفكرة دى فعلا اتنفذت الحمد لله وفيه اقبال كتير عليها

**فيه كمان فكرة جميلة قوى بدءوا فيها زمايلنا الى على المدونات فى انهم يتجمعوا سوا ويزورا مستشفياتنا الى فى مصر الى فيها مرضى فلسطينين ....اعتقد انها خطوة جميلة قوى فعلا تحسس الفلسطينين اننا معاهم

**كمان يا جماعه كلنا نقدر نجيب مدوات لفلسطينين كتير نقدر ندخل عليها ونحسسهم فعلا اننا حاسين بيهم

انا بس حبيت اقول ان الكلام ده بداية وخطوة للمهم الى هو التنفيذ وفيه فعلا حاجات كتير اتنفذت ولسة هتتنفذ باذن الله
اللهم ‏إنا ‏نشكو ‏إليك ‏اليهود ‏
فإنهم ‏لا ‏يعجزونك ‏يا ‏جبار ‏السموات ‏والأرض
‏اللهم ‏إحصهم ‏عددا ‏واقتلهم ‏بددا ‏ولا ‏تغادر ‏منهم ‏أحدا .
‏وأنزل ‏عليهم ‏عاجل ‏نقمتك ‏اليوم ‏أوغدا
‏اللهم ‏أحزنهم ‏كما ‏أحزنونا ‏وآسفهم ‏كما ‏آسفونا
اللهم ‏يتّـم ‏أطفالهم ‏ورمّـل ‏نساءهم ‏وعقّـم ‏أرحامهم ‏وأرّق ‏نومهم يامن ‏قلت ‏في ‏كتابك ( ‏لتجدن ‏أشد ‏الناس ‏عداوة ‏للذين ‏آمنوا ‏اليهود ‏والذين ‏أشركوا)
‏اللهم ‏آتي ‏اليهود ‏وكل ‏من ‏والاهم ‏ضعفين ‏من ‏العذاب ‏والعنهم ‏لعنا ‏كبيرا ‏بقوتك ‏يا ‏جبار
‏اللهم ‏اجعل ‏بيوتهم ‏عليهم ‏ردما
‏اللهم ‏اجعل ‏قنابلهم ‏عليهم ‏دمدما ‏وعويل ‏نساءنا ‏عليهم ‏همهما
‏اللهم ‏اجعلهم ‏عبرة ‏للمعتبرين
اللهم ‏ومن ‏أرادنا ‏والإسلام ‏بخير ‏فوفقه ‏لكل ‏خير ‏ومن ‏أرادنا ‏والإسلام ‏بسوء ‏فاقسم ظهره ‏واجعل ‏كيده ‏في ‏نحره ‏ولا ‏تمهله ‏بين ‏يومه ‏وأمسه ‏آمين ‏آمين ‏آمين ‏وصلى ‏اللهم ‏على ‏سيدنا ‏محمد ‏وعلى ‏آله ‏وأصحابه ‏وسلم

بس فعلا ياجماعه لازم نبدء احنا الاول من جوانا وباذن الله نقدر نعمل حاجة .........ميرو انتكة

حسبنا الله ونعم الوكيل











كان نفسى بجد اكتب عن الى عمله البطل منتظر الزيدى والى بسببه فرح كل بيوت العرب بس للاسف مش بنلحق نفرح








الى حصل فى فلسطين بجد يقتل كل عربى مجزرة بمعنى الكلمة








الى تاعبنى بجد الاخبار الى بتقول ان الجيش المصرى فتح النار على الفلسطينين عند الحدود








سؤال صغير معلش
الناس دى تروح فين لما الناس كلها بتهرب منهم وبيخافوا يساعدوهم & بجد احساسك ايه لما تلاقى عربى زيك خايف وبيتقتل قدام عينيك وفى ايدينا الحل بس خايفين نتكلم








بجد انا جوايا كلام كتير قوى نفسى بجد كل بلد تحط نفسها مكان فلسطين اكيد هتحتاج اى مساعده ولو بسيطة نفسى كل عربى يحلم الحلم الى باحلمة كل يوم تقريبا الكلام بسيط قوى بس للاسف الفعل صعب قوى قوى بس مش مستحيل اكيد








قلوبنا معكى يا فلسطين اعتقد دى ابسط الصور صور اطفال فلسطين ...........ميرو انتكة

الحلم القاتل


احساس صعب قوى لما نبقى فى بلدنا ونلاقى شعب تانى جاى علينا عايز ياخد كل حقوقنا فى العيشة والراحة والامان


انا حلمت حلم صعب قوى يمكن حلمت بيه قبل كده كتير بس مش عارفه ليه المرة دى بالذات حبيت اقوله


حلمت ان بلد تانية عايزة تعيش فى بلدنا وجاية ضعيفه وبتطلب المساعده وبعد ما وافقنا انهم يعيشوا معانا مرة واحدة ظهر الشعب ده على حقيقته ودخل الجيش علينا وقتل كل حاجة حية وجميلة فى البلد قتل البراءة والطيبة قتل الايد الى ساعدته


كنت انا اخر واحدة فى الحلم اتقتلت يمكن لحبى فى الحياة كنت باحاول اهرب على امل انى ادافع عن بلدى بس للاسف البلد اتدمرت كلها



الحلم ده بجد حسسنى قوى باخواننا فى فلسطين فعلا مهما سمعنا عن الى بيحصل لهم ممكن نزعل شوية بس الى عايش فى الحدث غير الى بيسمع عنه اكيد فى الحلم ده فعلا حسيت بيهم وبالظلم الى هما حاسين بيه والخوف



بجد احنا لو اتجمعنا كلنا وبقينا ايد واحدة هترجع لنا فلسطين بس لاسف صعب بس اكيد مش مستحيل




ده كان بالنسبة لى حلم لفترة وبعد كده صحيت .....انما فى فلسطين دى حقيقة ومش بيصحوا منها



ميرو انتكة

كل سنة واحنا كلنا طيبين يا رب




كل سنة وانتم طيبين يا رب وعيد سعيد علينا وعليكم امين يا رب




والى وراه امتحانات زيى كده ما يكترشى من اللحمة ومن الخروجات هههههههههه






ميرو انتكة






انت طيب اذا انت عبيط

يا ترى الطيبة فى الزمن ده سذاجه وضعف

فيه مقطع من اغنية بس معبرة قوى لمحمد محى

بحب الناس ومشكلتى قوى حساس
ودائما طيبيتى تضعفنى فى عيون الناس

فيه مقطع تانى كمان بس لشيرين بتقول فيه

مش كبرياء لكن باصلح كل شىء فيه انكسر
ومن الغباء انك تعيش زى الملاك بين البشر



فعلا الطيبة فى الزمن ده ومع العالم ده ضعف

للاسف بالوم نفسى على الطيبة الى ازيانى وبتضعفنى قصاد الناس

امتى تتعامل مع الناس ببراءة الاطفال وامتى تتعامل معاهم كانك وحش زيك زيهم

يا ترى البنى ادم فى الاصل فيه البراءة والا الظلم

سؤال صعب قوى امتى اتعامل بطبيعتى مع الناس والثقة العمياء وامتى احاذر منهم

* * * انا عرفت الرد لازم احاذر منهم صعب قوى فى الزمن ده اننا نامن لاى انسان لازم نتعامل مع العالم الخارجى بنفس المعاملة علشان نقدر نعيش

انا خلاص اتعلمت الدرس ويا ريت الكل يتعلمه ان الطيبة ضعف وذل وموت

وعلشان نقدر نعيش حاجات كتير لازم تموت


ميرو انتكة

بالخيال لا محال

فى الخيال اكيد ما فيش مستحيل

فى الخيال نقدر نعيش فى سلام

فى الخيال نقدر نحب بعض ونلاقى نفسنا ونخلى الكل يحبنا

فى الخيال نقدر نروح لبعييييييييييييد قوى لجزيرة جميله كلها هدوء وحب وسلام وجمال

فى الخيال نلاقى الجنة وحوالينا كل الى بنحبهم

الناس جزئين جزء واقعى وخيالة ضيق

وجزء تانى خياله واسع مش بيحب يعيش فى الحاضر ودائما بيعيش فى الخيال

انا من الناس دى دايما بحب اعيش فى الخيال فى دنيا جميلة وبسيطة وكلها حب وسلام

ليه كل الى نفسنا فيه بيبقى فى الخيال بس

احنا ممكن بايدينا نخلى الخيال حقيقة بس اكيد هتبقى مهمة صعبة بس مش مستحيلة


كلنا جوانا احلام نفسنا نحققها بس فى البداية بتبقى خيال وبالوقت بتبقى حقيقة وحاضر

المهم اننا نبقى واقعيين اكيد بس جوانا نسبة من الخيال لان الخيال يعنى امل والامل هو الحياة واكيد كلنا بنحب الحياة